Saltar ao contido

Esta web só usa cookies propias técnicas, necesarias para o seu funcionamento. As estatísticas de visitas son anónimas e non usan cookies. Máis información no noso aviso sobre cookies.

Aceptar

Avance da Festa do Marisco 2010

O alcalde do Grove, José Antonio Cacabelos, e o concelleiro de Turismo, Jorge Olleros, presentaron onte nunha rolda de prensa un avance da programación da XLVII Festa do Marisco, que se desenvolverá do 1 ao 12 de outubro deste ano.

Máis actuacións musicais e a ausencia do Simposio de Escultura, que a partir de agora será bianual, son as novidades máis salientables.

No tocante ao Simposio de Escultura, o Grupo de Goberno pretende reducir a cantidade para gañar en calidade, reducindo tamén de cinco a tres o número de participantes e tentando traer escultores invitados de certo renome. Outro aspecto que os animou a tomar esta decisión, alén do elevado custo que supón manter o carácter anual do certame, foi a importancia de realizar unha reflexión respecto de onde colocar o inxente número de esculturas que se foron acumulando co paso dos anos. Porén, o alcalde quixo deixar claro que non se trata de reducir, senón de ampliar en calidade e destacou a pretensión do Goberno local de que a escultura en pedra se vaia intercalando pouco a pouco con outras manifestacións artísticas, como a pintura, a fotografía, a talla en madeira ou mesmo o graffiti.

No que se refire á música, esta comezará xa o día 1 de outubro coa Gala da Festa do Marisco, presentada polo actor meco Rubén Mascato, e na que actuarán a eurovisiva Soraya, o grupo Santa Fe e María López, finalista do programa de televisión Factor X. A seguir, subirá ao escenario o grupo arousán Cornelius, con David Chiquillo á fronte.

Ao día seguinte actuará no recinto da festa o Grupo Punto Cero.

A música tradicional dos grupos da localidade estará representada por Cantodorxo e polo Festival Paradanda-Mecos, que terá lugar o día 3 de outubro, por primeira vez durante esta festa.

O xoves 7, Emgrobes promoverá o desenvolvemento dunha xornada gastronómica, que este ano xirará en torno ás algas.

O venres día 8 actuará no recinto da festa a banda pop-rock gaditana Melocos.

O sábado 9 de outubro, o grupo Prisma fará unha dobre actuación: pola tarde na Praza de Arriba e pola noite no Corgo. A continuación, e no mesmo recinto, terá lugar a tradicional Noite Meiga e a Gran Queimada.

O domingo 10 de outubro haberá unha festa dos anos 60, 70 e 80, que animará o grovense Javi Solla.

Finalmente, o luns día 11 o grupo pop-rock granadino La Guardia porá o final de festa musical.


Todas as novas